Кадиев Руслан
Хастам бу Везачу Далла,
Мархин бутт баларна вайна, –
Шена чохь доссийна Къоръан,
Бусалба нахана совг1ат.
Хастам бу Везачу Далла,
Мархин бутт баларна вайна, –
Шен вонах шайт1а а доьхкуш,
Ялсамани не1 вайна йоьллуш.
Хастам бу Везачу Далла,
Мархин бутт баларна вайна, –
Иманехь нисдала хьовса,
1амалехь сов дуьйлуш г1овта.
Хастам бу Везачу Далла,
Мархин бутт баларна вайна, –
Хьо баре сатуьйсуш 1ийна,
Масне да эхарте вирзи.
Хастам бу Везачу Далла,
Мархин бутт баларна вайна, –
Хьадисе ладоьг1на дагца,
Ойланца хазло вай тахна.
Хастам бу Везачу Далла,
Мархин бутт баларна вайна, –
Къоръанца нисйина амал,
Комаьрша декъа вай саг1а.
Юха а вай Мархин батте
Кхачинчу Далла бу хастам.
МАРХИН БАТТАХ ЛАЬЦНА IЕЛАМНЕХАН КЪАМЕЛ
* Делан дуьхьа, къайлаха, ца кхайкхош кхаба беза Мархин бутт.
* Далла декхарна уггаре аттаниг – Мархин баттахь марха хилар ду.
* Мархин баттахь мел дина дика – парза санна деза ду.
* Дала вазвина ваитина веза хьаша ву Мархин бутт. Хьешана хьошалла дар вайна т1ехь ду.
* Мархин бутт т1ебог1уш самукъадаьлла, чекхболуш г1айг1ане хилар – бусалба нехан хаза г1иллакх ду.
* Мархин баттахь Делера къинхетам а боккха бу, беркат а доккха ду.
* Марха кхабар – боккъалла а вай Делах тешар ду.
* Делан дуьхьа марха кхабар – шайт1анна дуьхьала т1ом бар ду.
* Ялсамани не1арш йоьллу, жоьжаг1ати не1арш къовлу, шайт1анашна буржалш туху Мархин баттахь.
* Мархин баттахь шена гечдар ца лехнехь – шо эрна дайна ду.
Источник:: журнал "Нана"
checheninfo.ru
